Chinese Celebrity

Yu Tu လို့ ခေါ်နေကြတာကို ကျေနပ်ပျော်ရွှင်နေရတဲ့အကြောင်းအား ရှင်းပြခဲ့သူ Yang Yang

“You are My Glory” ဇာတ်လမ်းတွဲက ပြသပြီးစီးသွားတာတောင် Yu Tu နဲ့ Qiao JingJing တို့ စုံတွဲအကြောင်းကိုတော့ ဒီနေ့ထိ ပြောနေဆဲပါပဲ။ မကြာသေးခင်က COSMO မဂ္ဂဇင်းနဲ့ ပြုလုပ်ခဲ့တဲ့ အင်တာဗျူးမှာ Yang Yang ကိုယ်တိုင်ကကို “Yu Tu” ဆိုပြီး ပရိသတ်တွေက ခေါ်ဝေါ်သုံးနှုန်းတာမျိုးကို ကျေနပ်ပျော်ရွှင်မိရတဲ့ နောက်ကွယ်ကအကြောင်းအရင်းကို ဖြေဆိုခဲ့ပါတယ်။

Yang Yang က “ဒီလိုမျိုး ဇာတ်ကောင်နဲ့ တသားတည်းသတ်မှတ်ခံရတာမျိုးက ကျွန်တော့်အတွက် ပိုပြီးတော့တောင် ခိုင်မာစွာဆုံးဖြတ်နိုင်မှုတွေ ဖြစ်ပေါ်စေပါတယ်။ မင်းသားတစ်ယောက်အတွက် အရေးကြီးဆုံးအရာက ဇာတ်ကောင်နဲ့ပတ်သက်လို့ ကြည့်ရှုသူတွေရဲ့နှလုံးသားထဲမှာ တကယ့် အစစ်အမှန်လိုမျိုးဖြစ်အောင် ဖန်တီးနိုင်ဖို့ပါပဲ။

အခုချိန်မှာတော့ ဇာတ်ကောင်တစ်ခုချင်းစီတိုင်းကို အသက်ဝင်အောင်ပုံဖော်နိုင်ဖို့ ယုံကြည်ချက်တွေရှိနေပါပြီ” လို့ ရှင်းပြရင်း Yu Tu ကြောင့် သူ့ရဲ့လုပ်နိုင်ရည်စွမ်းအားကို စိတ်ချလာကြောင်း ပြောပြခဲ့ပါတယ်။ Yang Yang က သရုပ်ဆောင်အလုပ်အပြင် တက္ကသိုလ်ကျောင်းသားဘဝတုန်းက အက အထူးပြုဖြစ်တာကြောင့် သူ့ရဲ့ ကပြဖျော်ဖြေမှုတွေကို တချို့က ကြည့်ဖူးကြပါလိမ့်မယ်။ ဒါပေမဲ့ အကနဲ့ပတ်သက်တဲ့ ရှိုးတွေမှာတော့ Yang Yang က ပါဝင်ခြင်းမရှိခဲ့ပါဘူး။

အကရှိုးတွေမှာ ပါဝင်ဖို့ သူ့ရဲ့အဖွဲ့သားတွေအပါအဝင် အားလုံးက မြှောက်ပေးနေကြပေမဲ့ မင်းသားချောက ငြင်းဆန်ခဲ့ပါတယ်။ “ကျွန်တော့်မှာ အကလေ့ကျင့်ဖို့ အချိန်အလုံအလောက်မရှိပါဘူး။ အကနဲ့ အဆက်အစပ်မရှိတော့တာလည်း နှစ်တွေတော်တော်ကြာနေပါပြီ။ ကျွန်တော်က ဟိုးအဝေးကြီးမှ နောက်ကျကျန်နေခဲ့ပြီဖြစ်လို့ ကပြဖျော်ဖြေဖို့ဆိုတာ မဖြစ်နိုင်တော့ပါဘူး။

အကယ်၍ ကျွန်တော်ကသာ အကရှိုးတစ်ခုမှ နည်းပြအဖြစ်ကော၊ အဆုံးအဖြတ်အဖြစ်ပါ ပါဝင်လာရမယ်ဆိုရင် ဒါဟာ ပြိုင်ပွဲအတွက် မျှတမှုမရှိဘူးလို့ ထင်မိပါတယ်” လို့ သေချာပေါက် ပြောပြခဲ့တာဟာ Yang Yang ရဲ့ အလုပ်အပေါ် လေးစားမှုကို အတိုင်းသားမြင်နေရပါတော့တယ်။ အက,ကဖို့ မဖြစ်နိုင်ပေမဲ့ Yang Yang ရဲ့ ဇာတ်လမ်းသစ်တွေထွက်လာဖို့ အများကြီးရှိတာဖြစ်လို့ စောင့်ကြည့်အားပေးကြရပါဦးမယ်။

Source: Sohu
Photos: Weibo
Translated by Julix